მანჯუკიჩმა პსჟ-ზე უარი თქვა და მზადაა “იუვეში” დარჩეს

მარიო მანჯუკიჩმა „პარი სენ ჟერმენში“ გადასვლაზე უარი თქვა. იტალიური მედიის ცნობით, ხორვატი მოხიბლული არაა იმ ფაქტით, რომ ახალ გუნდს სატრანსფერო პერიოდის მიწურულს უნდა შეუერთდეს, ამიტომ ურჩევნია „იუვენტუსში“ დარჩეს.

ეს იმის მიუხედავად, რომ მაურიციო სარი ხორვატს არ სწყალობს და დიდი შანსია ჩემპიონთა ლიგის განაცხადშიც არ შეიყვანოს. სარი ფორვარდის პოზიციაზე მარიოზე წინ იგუაინსა და დიბალას აყენებს, ყოველშემთხვევაში, სანამ დიბალა გუნდშია მანჯუკიჩი მესამე ფორვარდია.

იტალიური მედია იმასაც იტყობინება, რომ ბალკანელი იანვრამდე დარჩენას გეგმავს და თუ ვითარება არ შეიცვლება, ზამთრის სატრანსფერო პერიოდში ან „მანჩესტერში“ გადავა, ან ჩინეთში გადაბარგდება.