ტურინის „იუვენტუსი“ ჟოაუ კანსელუსაც ყიდის. Tuttosport-ის ცნობით, ფაბიო პარატიჩი, რომელიც ინგლისში იმყოფება, პაულო დიბალას ტრანსფერის პარალელურად პორტუგალიელის „მანჩესტერ სიტიში“ გასხვისებაზეც მუშაობს და „ქალაქელებთან“ მოლაპარაკებებს აწარმოებს.
ინგლისში სატრანსფერო ფანჯარა 8 აგვისტოს იხურება და ამიტომ, მხარეები აჩქარდნენ. „იუვე“ კანსელუს სანაცვლოდ 55 მილიონ ევროს ითხოვს, ხოლო „სიტი“ მზადაა ბრაზილიელი მარჯვენა მცველი დანილო დათმოს, რომელსაც 30 მილიონ ევროდ აფასებს და ზედ 25 მილიონი ევროც დაამატოს.
როგორც წყარო იტყობინება, ტრანსფერის წარმატებით დახურვის ხელისშემშლელი ფაქტორები ამ დროისთვის არ იკვეთება.
შეგახსენებთ, რომ კანსელუ „იუვენტუსმა“ ერთი წლის წინ „ვალენსიადან“ 40 მილიონ ევროდ შეიძინა.