Juventus.Ge ტურინის იუვენტუსის ქართული ფან კლუბი
პაულო დიბალას „იუვენტუსიდან“ წასვლის საკითხი ისევ ღიაა. მიუხედავად ამხანაგურ მატჩებში მაღალ დონეზე თამაშისა, არგენტინელის ტურინული მომავალი ბეწვის ხიდზეა და პარალელურად მისი აგენტი პსჟ-სთან მოლაპარაკებებს მართავს.
ხორხე ანტუნი პარიზშია, სადაც ფრანგული გუნდის წარმომადგენლებს ხვდება. მეტიც, Sportmediaset-ის ინფორმაციით, არაა გამორიცხული, რომ დღეს საღამოს პარიზში თავად დიბალაც ჩაფრინდეს.
ასეთ შემთხვევაში, პაულო „პარმასთან“ შეხვედრაში „იუვენტუსს“ ვერ დაეხმარება და ახლოს იქნება „პარი სენ ჟერმენში“ გადაბარგებასთან.
შეგახსენებთ, რომ „იუვენტუსს“ დიბალას გაყიდვა გადაწყვეტილი აქვს, ხოლო „მანჩესტერ იუნაიტედსა“ და „ტოტენჰემში“ ტრანსფერები ბოლოსკენ ჩაიშალა. ახლა ერთადერთი გამოსავალი „პარი სენ ჟერმენია“ და წესით მიმდინარე კვირაში ყველაფერი უნდა გაირკვეს.
