ტურინის „იუვენტუსის“ ყოფილი კაპიტანი ჯანლუიჯი ბუფონი 2001 წელს და იმ პერიოდს იხსენებს, როდესაც „იუვეში“ გადავიდა. 41 წლის ფეხბურთელის განცხადებით, ტურინელთა ისტორიაში ეს გარიგება ერთ-ერთი საუკეთესო აღმოჩნდა.
„ეს იყო პერიოდი, როდესაც გუნდები ფეხბურთელებში ძალიან ბევრს არ ხარჯავდნენ. ვფიქრობ, ჩემი „იუვენტუსში“ ტრანსფერი ძალიან ჭკვიანური ნაბიჯი გახლდათ. იყვნენ კრიტიკოსები, რომლებიც ამბობდნენ: „არა, არ შეიძლება მეკარეში ამხელა თანხის გადახდა“…
თუმცა, საბოლოოდ, „იუვეში“ 17 წელი დავრჩი. ვფიქრობ, „ბიანკონერის“ ისტორიაში ჩემი ტრანსფერი ერთ-ერთი საუკეთესო გარიგება იყო“, – უთხრა ჯიჯიმ Four Four Two-ს.
შეგახსენებთ, რომ ბუფონი „იუვენტუსს“ 2001 წლის 3 ივლისს, „პარმადან“ 52 მილიონ ევროდ შეუერთდა. მაშინ იტალიელი ყველა დროის ყველაზე ძვირადღირებული მეკარე გახდა და მისი რეკორდი გასულ ზაფხულს ჯერ ალისონმა, მერე კი კეპა არიზაბალაგამ დაამხეს…