პირველი ტური ახლოვდება: სარის სამი თავსატეხი

ტურინის „იუვენტუსი“ 2019-2020 წლების სეზონის დაწყებამდე ბოლო ამხანაგურ მატჩს შაბათს, ტრიესტეში, „ტრიესტინასთან“ ჩაატარებს და შემდეგ უკვე „პარმასთან“ სეზონის პირველი შეხვედრისთვის ფიქრს დაიწყებს.

„იუვე“ ტრიესტეში 2012 წლის 6 მაისის შემდეგ პირველად ბრუნდება, როდესაც „კალიარის“ სწორედ ამ ქალაქში 2:0 აჯობა და 2011-2012 წლების სეზონში სკუდეტო ოფიციალურად გაიფორმა. ვთქვათ, რომ ამ შეხვედრაში ვერ ითამაშებს კრიშტიანუ რონალდუ, რომელსაც მცირე ტრავმა აწუხებს. თუმცა, პორტუგალიელი „პარმასთან“ მატჩისთვის მზად იქნება.

მაურიციო სარის კი, სერია A-ს პირველი ტურისთვის შემადგენლობაში სამი საფიქრალი აქვს. ბონუჩი-დე ლიხტი, ემრე ჯანი-ხედირა და იგუაინი-დიბალა. Gazzetta Dello Sport-ის ცნობით, მაურიციო ამ სამ პოზიციაზე ჯერჯერობით ჩამოყალიბებული არაა.

სამაგიეროდ, უკვე გადაწყვეტილი აქვს, რომ პარმეზანელების წინააღმდეგ ძირითად შემადგენლობაში იქნებიან შჩესნი, დანილო, კიელინი, ალექს სანდრო, პიანიჩი, რაბიო, დუგლას კოშტა და რონალდუ.