ბენტანკური: “ახლა “ვალენსიასთან” მატჩზე ვფიქრობთ”

ტურინის „იუვენტუსის“ ნახევარმცველმა როდრიგო ბენტანკურმა „სპალთან“ გამარჯვებას მნიშვნელოვანი უწოდა და დასძინა, რომ ახლა გუნდი „ვალენსიასთან“ გასამართ შეხვედრაზე ფიქრობს.

„ამჟამად უწყვეტობას ვგრძნობ, რადგან მუდმივად ვთამაშობ. ვწუხვარ, რომ ჩემს თანაგუნდელებს ტრავმები აქვთ და ვცდილობ, რომ შანსი საუკეთესოდ გამოვიყენო. დღეს გამარჯვება მნიშვნელოვანი იყო, რადგან ეროვნული ნაკრებებიდან დაბრუნების შემდეგ თამაში ადვილი არაა. თუმცა, ჩვენ მიზანს მივაღწიეთ. ახლა „ვალენსიასთან“ მატჩზე ვფიქრობთ, უმნიშვნელოვანესი თამაშია, რადგან შემდეგი ეტაპის საგზური უნდა მოვიპოვოთ“, – თქვა ბენტანკურმა.

შეგახსენებთ, რომ „იუვენტუსმა“ სერია A-ში 13 ტურის შემდეგ 37 ქულა დააგროვა და პირველ ადგილზეა. მომდევნო მატჩს კი 27 ნოემბერს, ჩემპიონთა ლიგაზე „ვალენსიასთან“ ჩაატარებს.