ამ დღეს: 26 წლის წინ დელ პიერო “პინტურიკიო” გახდა – ერთი გოლით შეცვლილი ბედისწერა [VIDEO]

არსებობს ერთი დღე, რომელიც სხვებზე მეტად აღნიშნავს დელ პიეროს ეპოქის დაწყებას „იუვენტუსში“. ზუსტი მომენტი, როდესაც ალექსი „პინტურიკიო“ ხდება ან ადამიანი, რომელიც წლების განმავლობაში „იუვეს“ ოცნებებს დახატავს და რობერტო ბაჯოს სცენას წაართმევს.

4 დეკემბერი, 1994 წელი. იმ შუადღით, მარჩელო ლიპის „იუვენტუსი“ კლაუდიო რანიერის და გაბრიელ ბატისტუტას „ფიორენტინას“ მასპინძლობდა. „დელე ალპიზე“. ბაჯოს მუხლის ტრავმა ჰქონდა, ასევე ტრავმების გამო კოლერი, ფუზი, დი ლივიო და ანტონიო კონტე ვერ თამაშობდნენ.

ბიჭი, რომელიც „იუვეში“ ერთი წლით ადრე „პადოვადან“ მივიდა, 20 წლის ახალი შესრულებული იყო და „იუვენტუსის“ 10-ნომრიანი მაისურით გავიდა მოედანზე, რომელიც ამის შემდეგ აღარ გაუხდია. თუმცა, როგორც საუკეთესო ზღაპრებში, დასაწყისი კოშმარულია.

„იუვესთვის“ ყველაფერი ცუდად დაიწყო და 9 წუთში ბაიანოსა და კარბონეს გოლებით ფლორენციელები 2:0 დაწინაურდნენ. სერია A-ს იმ დროს „პარმა“ ლიდერობდა და „იუვესთვის“ ეს წაგება დიდი დარტყმა იქნებოდა.

გასახდელში მარჩელო ლიპიმ გუნდი გამოაცოცხლა. ტურინელებს სკუდეტო 10 წელი არ ჰქონდათ მოგებული, ამიტომ, ის სეზონი ძალიან მნიშვნელოვანი იყო. „ბიანკონერი“ მეორე ტაიმში მოედანზე შეცვლილი გავიდა და იწყებენ შეტევაში თამაში. თუმცა, განსაკუთრებული შედეგის გარეშე, ოღონდ 73-ე წუთამდე…

ჯანლუკა ვიალიმ ყველაფერი შეცვალა. კაპიტანმა სამწუთიან ინტერვალში დუბლი შეასრულა და ანგარიში გაათანაბრა. დასასრული? არა, პირიქით. ამბავი ამის შემდეგ დაიწყო. ამბავი იმ დღეს იწყება.

88-ე წუთი მიმდინარეობს. ატილიო ლომბარდო მოედნის ცენტრიდან გრძელ პასს აკეთებს საჯარიმოსკენ, იქ ბიჭი გრძელი თმებით და 10 ნომრით შეირბენს, ბურთს არ აჩერებს, არ ამუშავებს, უბრალოდ აკრობატულ სტილში ურტყამს, რბილად ეხება ბურთს და მეკარე ფრანჩესკო ტოლდო ვერაფერს ახერხებს საოცარი დარტყმის წინააღმდეგ: „იუვენტუსი“ – „ფიორენტინა“ 3:2.

ემოცია ძალიან დიდი იყო. ახალგაზრდა დელ პიეროს თანაგუნდელები დაესივნენ. ეს იყო დღე, როდესაც „პინტურიკიო“ დაიბადა. ისტორია კიდევ 18 წელი გაგრძელდა, ყოველთვის შავ-თეთრი ისტორია.

აღსანიშნავია, რომ თვითონ დელ პიეროსაც ეს გოლი მისი კარიერის საუკეთესო გოლად მიაჩნია:

„ჩემი მხრიდან რთულია არჩევანის გაკეთება, სხვებმა უნდა შეარჩიონ. მაგრამ მაინც, ეს არის 1994 წელს „ფიორენტინასთან“ გატანილი გოლი. ჩემთვის, ეს გოლი ჩემი გუნდის წარმატების საწინდარი და სომბოლოა“, – თქვა ალექსმა წლების მერე.

სინამდვილეში იმ დღეს „იუვენტუსში“ დელ პიეროს ეპოქა დაიაბდა. იმ დღეს ყველა მიხვდა, რომ დიდხნიანი უტიტულობა დასრულდ ადა სეზონის ბოლოს სკუდეტო ტურინში დაბრუნდებოდა (ასეც მოხდა). ლუჩანო მოჯი კი გადაწყვეტს, რომ რობერტო ბაჯო აღარ არის აუცილებელი და შეუცვლელი. „ბებერმა სინიორამ“ ახალი 10 ნომერი იპოვა.

იმ დღეს დაიწყო სიყვარულის ისტორია, რომელიც თითქმის 20 წელი გაგრძელდა. „პინტურკიოდან“ გოდომდე – დელ პიერო დარჩება „იუვენტუსის“ სამყაროს ეპიცენტრად. „იუვენტუსის“ სიმბოლო ტრიუმფებში, მაგრამ ასევე ადამიანი, რომელიც ყოველთვის გუნდთან ერთად იყო მწარე მომენტებში.

„აჰ, როგორ თამაშობს დელ პიერო“…