“არსენალი” “იუვენტუსის” ორი ფეხბურთელით დაინტერესდა

ლონდონის „არსენალი“ ტურინის „იუვენტუსის“ ფეხბურთელებით, არტურით და დეიან კულუშევსკითაა დაინტერესებული.

ორივე მოთამაშე მასიმილიანო ალეგრის გეგმებს მიღმაა და არაა გამორიცხული გუნდმა ისინი იანვარშივე გაუშვას. განსაკუთრებით არტური, რომლის აგენტმა უკვე დაადასტურა, რომ ეცდება ზამთრის სატრანსფერო პერიოდში თავისი კლიენტისთვის ახალი გუნდი მოძებნოს.

კულუშევსკის რაც შეეხება, „იუვე“ მისი გაყიდვიდან შემოსული ფულით ახალი თავდამსხმელის ან ცენტრალური ნახევარმცველის დამატებას განიხილავს.

ჯერჯერობით, უფრო მეტი დეტალი უცნობია. არტურით „არსენალის“ გარდა, „რომა“, პსჟ და „სევილიაც“ არიან დაინტერესებული. ბრაზილიელმა ფეხბურთელმა მიმდინარე სეზონში ძირითად შემადგენლობაში მხოლოდ ორი მატჩი ჩაატარა და უმეტეს დროს სათადარიგო სკამზე ატარებს.