ალექს სანდრო “იუვესთან” კონტრაქტს გაახანგრძლივებს

ტურინის „იუვენტუსი“ ალექს სანდროს სავარაუდოდ კონტრაქტს გაუხანგრძლივებს. ამის შესახებ იტალიური მედია წერს.

ბრაზილიელი ფეხბურთელის ხელშეკრულებაში არის პუნქტი, რომლის თანახმად გარკვეული რაოდენობის მატჩებზე კონტრაქტის ერთი წლით განახლებაა შესაძლებელი და სწორედ ეს პუნქტი ამოქმედდება.

ამრიგად, დიდი შანსია, რომ სანდრომ მომდევნო სეზონიც „იუვეში“ გაატაროს, მიუხედავად იმისა, რომ ბოლო პერიოდში ბევრი კრიტიკოსი ჰყავს. ისიც უნდა ითქვას, რომ სამცველიან სქემაში ცენტრალურ მცველად ალექსმა თამაში ბევრად გააუმჯობესა, ვიდრე მარცხენა მცველად თამაშობდა.

ალექს სანდრო „იუვენტუსში“ 2015 წლიდან თამაშობს და დღემდე 299 შეხვედრაში 15 გოლი გაიტანა. მე-300 მატჩის ჩატარების შემდეგ მისი მაისური „იუვენტუსის“ მუზეუმში სამუდამო ბინას დაიდებს.

საინტერესოა, რომ „იუვეს“ ისტორიაში ლეგიონერებს შორის მასზე მეტი მატჩი მხოლოდ პაველ ნედვედს (327) და დავიდ ტრეზეგეს (320) აქვთ ჩატარებული.