მასიმილიანო ალეგრი როგორც ჩანს, ალვარო მორატას თამაშით კმაყოფილია და გუნდის ხელმძღვანელობას მისი შენარჩუნება მომდევნო სეზონისთვისაც სთხოვა.
ესპანური მედიის ცნობით, სწორედ ამიტომ, „იუვე“ ეცდება, რომ ზაფხულში მადრიდის „ატლეტიკო“ ფასდაკლებაზე დაიყოლიოს. საქმე ისაა, რომ ტურინელებმა მადრიდელებს ორწლიან იჯარაში 20 მილიონი ევრო გადაუხადეს, მაგრამ ალვაროს გამოსყიდვა ზაფხულში კიდევ 35 მილიონი ევრო დაუჯდება.
ეს თანხა იტალიელებს მორატაში ეძვირებათ და ეცდებიან, რომ „ატლეტიკო“ ფასის დაკლებაზე დაითანხმონ.
შეგახსენებთ, რომ ალვარო მორატამ „იუვენტუსში“ დაბრუნების შემდეგ (2020 წლიდან) 73 მატჩი ჩაატარა და 28 გოლი გაიტანა. შედარებისთვის, 2014-2016 წლებში, როცა ის ტურინულ კლუბში პირველჯერზე თამაშობდა 93 თამაშში 27 გოლი გაიტანა.