“იუვეს” ქალთა გუნდმა იტალიის თასი მოიგო და სეზონი სამი ტიტულით დაასრულა

ტურინის „იუვენტუსის“ ქალთა გუნდმა სეზონში მესამე ტიტული მოიგო და ამჯერად იტალიის თასს დაეუფლა.

ჯო მონტემუროს გუნდმა ფინალში „რომას“ აჯობა, არადა, ტურინელებმა 23-ე წუთზე გაუშვეს და მე-80 წუთამდე აგებდნენ, მაგრამ 4-წუთიან ინტერვალში ყველაფერი შეიცვალა. მე-80 წუთზე კრისტიანა ჯირელიმ გაათანაბრა, 4 წუთში კი სარა გამამ გამარჯვების გოლი გაიტანა.

„იუვეს“ ქალთა გუნდმა იტალიის თასი მეორედ მოიგო, სეზონი კი სამი ტიტულით დაასრულა – სკუდეტო, იტალიის სუპერთასი და იტალიის თასი.

ამრიგად, ქალთა გუნდს ვაჟებისგან სრულიად საპირისპირო და განსხვავებული სეზონი ჰქონდათ.