რაბიო: “როცა გოლები გაგაქვს, ყველას უყვარხარ, ფეხბურთში ეს ბუნებრივია”

ტურინის „იუვენტუსის“ ფეხბურთელმა ადრიენ რაბიომ „ლაციოსთან“ მარცხის (1:2) შემდეგ, რომელშიც მან გოლი გაიტანა, კომენტარი გააკეთა. როგორც მან თქვა, კონტრაქტის განახლებაზე კლუბის ხელმძღვანელობასთან უნდა ისაუბროს.

„მართალია, პირველი ტაიმი ცუდად ჩავატარეთ, ვერ მოვიგეთ დუელები, ყველა ბურთი დავკარგეთ, მეორე ტაიმი ბევრად უკეთესი იყო, მაგრამ პირველი ტაიმი სამარცხვინო იყო. არ ვიცი, ასეთი სხვაობა რით ავხსნა, მაგრამ რეაქცია გვქონდა, მეორე ნახევარი ბევრად უკეთესი იყო, თუმცა არასაკმარისი.

დიახ, რა თქმა უნდა, ჩემი საუკეთესო სეზონია, ძალიან გავიზარდე, განსაკუთრებით ბოლო ორი წლის განმავლობაში. ბევრს ვმუშაობ გოლების გატანაზე, ნახევარდაცვაში ლიდერობაზე, როგორც შემტევ, ისე დაცვით ფაზაში. ჩემი სეზონით კმაყოფილი ვარ, ყოველთვის ვცდილობ გუნდს 100%-ით დავეხმარო.

დიახ, ნაკრებში სხვა როლი მაქვს, „იუვეში“ სხვა, ეს მომწონს, რადგან ხშირად შემიძლია საჯარიმოში შესვლა, გოლის ზონაში. ეს არის ჩემი თვისებები, მომწონს წინა „მეძალად“ თამაში, ნაკრებში კი უფრო ბევრი შემტევი მოთამაშე გვყავს და უფრო უკან ვთამაშობ.

პირველ რიგში ვცდილობ მოედანზე 100%-ით დავიხარჯო, პირველი დღიდან, რაც აქ ვარ. ფეხბურთში ყოველთვის ასეა, თუ გოლებს იტან, ყველას უყვარხარ, თუ გოლს ვერ გაიტან, ცუდი ფეხბურთელი ხარ. მე ორიენტირებული ვარ იმაზე, რაც უნდა გავაკეთო, რომ დავეხმარო გუნდს და ვცდილობ, მოვიგოთ. გოლებით და საგოლე პასებით ხალხი უფრო მიყვარებს, მაგრამ ეს ფეხბურთში ბუნებრივია. კონტრაქტის განახლება? არ ვიცი, ჯერ კლუბთან უნდა ვისაუბრო“, – თქვა რაბიომ.

შეგახსენებთ, რომ ადრიენ რაბიოს მიმდინარე სეზონში ყველა ტურნირზე 10 გოლი დაუგროვდა. „იუვე“ მომდევნო მატჩს ევროპა ლიგაზე „სპორტინგთან“ ჩაატარებს.