მთავარი / სიახლეები / “იუვენტუსის” ურთიერთშეხვედრები ჩემპიონთა ლიგის მეტოქეებთან

“იუვენტუსის” ურთიერთშეხვედრები ჩემპიონთა ლიგის მეტოქეებთან

ტურინის „იუვენტუსი“ ჩემპიონთა ლიგის G ჯგუფში „ბარსელონას“, კიევის „დინამოსა“ და უნგრულ „ფერენცვაროშს“ დაუპირისპირდება. უკვე ცნობილია კალენდარიც – ანდრეა პირლოს გუნდი ჯგუფურ ეტაპს კიევში დაიწყებს და ბარსელონაში დაასრულებს.

„ბებერ სინიორას“ მომავალ მეტოქეებთან ასეთი ისტორია აქვს:

„იუვენტუსისა“ და „ბარსელონას“ ურთიერთშეხვედრების ისტორია უსასრულოა. პირველად ეს გუნდები ერთმანეთს 1970-1971 წლების სეზონში შეხვდნენ და ორივე თამაში „იუვემ“ 2:1 მოიგო.

შემდეგ იყო 1985-1986 წლების სეზონი, სადაც ჩემპიონთა ლიგის მეოთხედფინალში გამარჯვება ესპანელებს დარჩათ (1:0, 1:1). 1990-1991 წლების სეზონში, თასების თასის ნახევარფინალშიც „ბარსელონამ“ მოიგო (3:1, 0:1). ამის შემდეგ გუნდები მხოლოდ ჩემპიონთა ლიგაზე ხვდებიან ერთმანეთს. 2002-2003 წლების სეზონში „იუვემ“ მეოთხედფინალში სძლია მეტოქეს (1:1, 2:1), 2015 წელს ფინალში წააგო (1:3), 2016-2017 წლების სეზონში კი მეოთხედფინალში კვლავ იტალიელებმა იმარჯვეს (3:0, 0:0). ბოლოს ეს გუნდები 2017-2018 წლების სეზონში ჯგუფურ ეტაპზე დაუპირისპირდნენ და „ბარსელონამ“ სახლში 3:0 მოიგო, ხოლო ტურინში გოლი არ გასულა.

მთლიანობაში ეს გუნდები 13-ჯერ შეხვდნენ, 5 მატჩი ტურინელებმა მოიგეს, 4-ჯერ ესპანელებმა და 4-ჯერაც თამაში ფრედ დასრულდა (15:14 ბურთების ბალანსი „ბარსას“ სასარგებლოდ). ტურინში „იუვენტუსმა“ 6 მატჩიდან 3 მოიგო და 3 ფრე დაფიქსირდა, „ბარსას“ არასდროს მოუგია იტალიაში, ხოლო ბარსელონაში „იუვენტუსმა“ 2-ჯერ იმარჯვა, ერთხელ ფრე დაფიქსირდა და 3-ჯერ კატალონელებმა იმძლავრეს. 1 მატჩი ნეიტრალურ სტადიონზე ჩატარდა და „ბარსელონამ“ ჩემპიონთა ლიგის ფინალში აჯობა „იუვეს“.

„იუვენტუსი“ კიევის „დინამოს“ აქამდე ოთხჯერ შეხვედრია და აშკარა უპირატესობას ფლობს – 3 მოგება, 1 ფრე, 0 წაგება (12:3 ბურთების ბალანსი). 1997-1998 წლების სეზონში ჩემპიონთა ლიგის მეოთხედფინალში ტურინში პირველი მატჩი 1:1 დასრულდა, მაგრამ კიევში „იუვემ“ 4:1 მოიგო და მომდევნო ეტაპზე გავიდა. შემდეგ იყო 2002-2003 წლების სეზონი და პირველი ჯგუფური ეტაპი. „დელე ალპიზე“ ტურინელებმა მეტოქე 5:0 განაადგურეს და შემდეგ ბოლო ტურში კიევში, არაფრის მომცემ მატჩში 2:1 იმარჯვეს. როგორც ხედავთ, „იუვენტუსს“ კიევში ორივე თამაში მოგებული აქვს, ხოლო ტურინში ერთხელ იმარჯვა, ერთხელაც ფრეს დასჯერდა.

„იუვენტუსი“ და „ფერენცვაროში“ ერთმანეთს 1932-1965 წლებში შვიდჯერ შეხვდნენ, მაგრამ ისეთ ტურნირებზე, დღეს, რომ აღარ არსებობს. ბოლო დაპირისპირება 1965 წელს უნგრელების გამარჯვებით დასრულდა (1:0).

შეგახსენებთ, რომ ჩემპიონთა ლიგის პირველ ტურში „იუვენტუსი“ 20 ოქტომბერს, კიევში „დინამოს“ დაუპირისპირდება.

შემთხვევითი სიახლე

ოუარისთვის ბრძოლაში “იუვეს” კონკურენტები ჰყავს

ფრანგული „ლიონის“ ნახევარმცველ ჰუსემ ოუარს შესანიშნავი სეზონი აქვს და ევროპული გრანდების ყურადღების ცენტრშია. მათ შორის, …

კლაუდიო მარკიზიო შესაძლოა ტურინის მერი გახდეს

„იუვენტუსის“ ყოფილი ფეხბურთელი კლაუდიო მარკიზიო შესაძლოა, ტურინის მერი გახდეს. იტალიური მედიის ცნობით, დემოკრატიული პარტია არჩევნებში …