ტურინის „იუვენტუსის“ მცველმა ლეონარდო ბონუჩიმ „მილანთან“ გამარჯვების შემდეგ კომენტარი გააკეთა. იტალიელი ფეხბურთელის განცხადებით, ამ მოგებით დამტკიცდა, რომ გუნდი ისევ მშიერია.
„ვიცოდით, რომ კორონავირუსი შემთხვევების მიუხედავად უნდა გვეთამაშა. მნიშვნელოვანი იყო გამარჯვება, განსაკუთრებით ტურის სხვა მატჩების შედეგებიდან გამომდინარე და ეს ნიშნავს, რომ გუნდი ისევ მშიერია. თავიდან ბოლომდე კარგად წარვმართეთ თამაში, ბევრი საგოლე მომენტი შევქმენით და გოლი მხოლოდ ჩვენი შეცდომის შედეგად გავუშვით. ჩვენ ნამდვილი გუნდი ვიყავით, ვიბრძოდით და ეს სულისკვეთება გვინდა ყველა მატჩში გვქონდეს.
ახლა „სასუოლოსთან“ მატჩზე ვფიქრობთ, შემდეგ სხვა მატჩებია და „ინტერთან“ თამაშამდე დრო გვაქვს. გამარჯვებები კიდევ უნდა მოვიპოვოთ, რომ კიდევ უფრო თავდაჯერებულები და უფრო გუნდურები გავხდეთ“, – თქვა ბონუჩიმ.
შეგახსენებთ, რომ „იუვენტუსი“ 30 ქულით მეოთხე ადგილზეა, მომდევნო ტურში კი 10 იანვარს, „სასუოლოს“ დაუპირისპირდება.