კულუშევსკი და ბენტანკური “ტოტენჰემში”, ზაკარია “იუვეში” – ყველაფერი გადაწყდა

დეიან კულუშევსკი და როდრიგო ბენტანკური კარიერას ლონდონის „ტოტენჰემში“ გააგრძელებენ. ტრანსფერები დაიხურა, ამის შესახებ ფაბრიციო რომანო და რომეო აგრესტი იტყობინებიან.

ბენტანკური ინგლისურ კლუბში 19 მილიონი ევროს სანაცვლოდ გადავა, რასაც ბონუსის სახით 6 მილიონი ევრო დაემატება. როდრიგო „იუვეში“ 2017 წლიდან თამაშობდა და 181 მატჩში 3 გოლი გაიტანა. მან ბოლო მატჩი ტურინულ გრანდში „მილანის“ წინააღმდეგ ჩაატარა და მოედანზე საუკეთესო იყო, თუმცა, მთლიანობაში ის მოლოდინი ვერ გაამართლა, რაც მის მიმართ არსებობდა.

დეიან კულუშევსკი „ტოტენჰემში“ 10 მილიონი ევროს ღირებულების 18-თვიანი იჯარით გადავა, მაგრამ ინგლისელებს მისი გამოსყიდვა 25 მილიონ ევროდ შეეძლებათ, რასაც ბონუსის სახით 5 მილიონიც დაემატება და მთლიანობაში გარიგება 40 მილიონ ევროს შეადგენს. გამოსყიდვის სავალდებულო პუნქტი გააქტიურდება იმ შემთხვევაში თუ „ტოტენჰემი“ ჩემპიონთა ლიგაზე გავა ან კულუშევსკი მატჩების ნახევარს მაინც ითამაშებს. შვედმა „იუვეში“ გატარებულ წელიწადნახევარში 74 მატჩში 9 გოლი გაიტანა და 10 საგოლე პასი გააკეთა. ორივე ფეხბურთელი ანტონიო კონტესთან იმუშავებს, ტრანსფერს ხელი ფაბიო პარატიჩიმ შეუწყო, რომელმაც ისინი თავის დროზე „იუვეში“ მიიყვანა.

პარალელურად, „იუვენტუსმა“ წარმატებით დახურა დენის ზაკარიას ტრანსფერი. „გლადბახის“ შვეიცარიელი ფეხბურთელი ტურინში სავარაუდოდ დღეს საღამოს ჩავა, მაქსიმუმ ხვალ დილით. ის 4.5-წლიან კონტრაქტს გააფორმებს და მისი ხელფასი სეზონში 3 მილიონი ევრო იქნება. „გლადბახი“ 3.5 მილიონ ევროს მიიღებს, 3.5 მილიონი ევრო კი ბონუსის სახით დაემატება. ზაკარიას მიმართ ინტერესს „ბაიერნი“, „ლივერპული“ და „მანჩესტერი“ იჩენდნენ, მაგრამ ტურინელებმა მათ დაასწრეს. შვეიცარიელის იაფი ღირებულება კი კონტრაქტის დამსახურებაა, რომელიც 30 ივნისს იწურება და გერმანელებმა უფასოდ დაკარგვას, გარკვეული ფინანსური სარგებლის ნახვა ამჯობინეს.

აქვე გეტყვით, რომ „იუვენტუსი“ „კალიარიდან“ ნაჰიტან ნანდესის ტრანსფერზე აქტიურად მუშაობს და შესაძლოა ურუგვაელი ფეხბურთელიც გაიფორმოს.

Juventus are closing on Denis Zakaria deal. He’s set to sign on permanent move – just final details on bonuses to be discussed today then Zakaria will fly to Turin. 🛩⚪️⚫️ #Juventus

Deal ready to replace Rodrigo Bentancur who’s joining Juventus.

— Fabrizio Romano (@FabrizioRomano) January 30, 2022