ტურინის „იუვენტუსის“ ქალთა გუნდმა ჩემპიონთა ლიგის მესამე ტურში საკუთარ მოედანზე გერმანულ „ვოლფსბურგს“ უმასპინძლა, რომელიც ქალთა ფეხბურთში ერთ-ერთი საუკეთესო გუნდია და ტურნირის ფავორიტთა შორისაა.
„იუვემ“ გამოცდილ და ძლიერ მეტოქეს ღირსეული წინააღმდეგობა გაუწია და ქულა მოიპოვა. ტურინელები 22-ე წუთზე კრისტიანა ჯირელის გოლით დაწინაურდნენ და იგებდნენ, მაგრამ სამ წუთში „ვოლფსბურგმა“ წონასწორობა აღადგინა.
65-ე წუთზე „მგლებმა“ იტალიელთა კარი მეორედ დალაშქრეს და გამარჯვებასთან ძალიან ახლოს იყვნენ. თუმცა, მსაჯის მიერ კომპენსირებულ პირველ წუთზე ჯირელიმ საჯარიმოში კიდევ ერთხელ ითამაშა შესანიშნავად და საბოლოო ანგარიში დააფიქსირა – 2:2.
„დელ პიეროს დაბადების დღეზე დუბლის შესრულება ჩემპიონთა ლიგაზე, თანაც ამ სტადიონზე, ნამდვილი ოცნებაა“, – თქვა მატჩის შემდეგ პრესკონფერენციაზე ჯირელიმ.
„იუვენტუსის“ ქალთა გუნდს ჯგუფში 3 ტურის შემდეგ 4 ქულა აქვს და მესამე ადგილზეა, ჩამორჩება „ჩელსის“ 3 და „ვოლფსბურგს“ 1 ქულით, მომდევნო ტურში კი 18 ნოემბერს, სტუმრად ისევ „ვოლფსბურგს“ შეხვდება.