ბონუჩი: “უემბლიზე” გამარჯვება კიდევ უფრო ისტორიული იქნება”

იტალიის ნაკრების ვიცე-კაპიტანმა ლეონარდო ბონუჩიმ ინგლისთან მატჩის წინ კომენტარი გააკეთა. 34 წლის ფეხბურთელის თქმით, უნდათ, რომ იტალიელები გაახარონ და მიუხედავად იმისა, რომ „უემბლიზე“ სტუმრები იქნებიან, ეს არ აშინებთ.

„კვირას გამარჯვება მნიშვნელოვანი იქნებოდა იტალიის საფეხბურთო სამყაროსთვის, თითოეული ფეხბურთელისთვის, ფედერაციისთვის და იმიტომ, რომ ეს გამარჯვება რთულ წლებს გაანულებდა. დიდი სიხარული იქნება და რწმენა იტალიელი ხალხისთვის. მას შემდეგ, რაც გუნდში მანჩინი მოვიდა, სწრაფადვე მოვახერხეთ ფეხზე წამოდგომა 2018 წლის მუნდიალის იმედგაცრუების შემდეგ. მან ჩვენთან იმუშავა, აღადგინა ჩვენი თვითშეფასება, დაამატა ხარისხი და ამის წყალობით ვიგებთ. სამი წლის წინ უტოპია იყო ევროპის ჩემპიონატის ფინალში გასვლა, მაგრამ ერთი წლით მეტი გამო გამოცდილება დაგვეხმარა. ნახევარდაცვაში ბევრი ნიჭიერი ფეხბურთელია, რამაც გზა გაადვილა.

მხოლოდ ფეხბურთის თამაშზე, სიამოვნების მიღებაზე და ენთუზიაზმის მიღებაზე ვფიქრობთ. მოუთმენლად ველოდებით თამაშს. ძალიან მშვიდად ვარ, იმედი მაქვს, რომ ამ გრძნობას თანაგუნდელებსაც გადავცემ, თამაშის წინა ასეთი მდგომარეობა ჩემპიონთა ლიგაზეც ხშირად მაქვს გამოცდილი. ეს არის თამაში, რომელიც ლამაზი იქნება იტალიისთვის, ინგლისისთვის, ასევე მსაჯებისთვის. „უემბლიზე“ თამაში მხოლოდ სტიმულია ისტორიული საქმის გასაკეთებლად. ჩვენ ინგლისელების სახლში ვითამაშებთ, მაგრამ ამის არ გვეშინია.

ნულოვანი ალიბი, გუნდში დაღლილობა არ არსებობს. ბევრი დრო გვქონდა აღსადგენად, კვირას ბრძოლისთვის მზად ვიქნებით. პრეზიდენტი მატარელაც იქ იქნება და ვეცდებით ის და იტალიელი ხალხი გავახაროთ. ესპანეთთან გამარჯვების შემდეგ ქუჩებში ვნახე სცენები, რომლებიც შეიძლება აღარასდროს განმეორდეს.

ინგლისს ძალიან ძლიერი თავდამსხმელები ჰყავს, ყურადღება უნდა მივაქციოთ მთლიანად გუნდს, ფლანგებზე სისწრაფე აქვთ და ძლიერი ცენტრფორვარდები ჰყავთ, კეინი და კალვერტ-ლიუნი. კეინი სიახლე არ არის, ის მსოფლიოში საუკეთესო თავდამსხმელებშია, როგორც ის ფორვარდები, რომლებსაც ბოლო მატჩებში ვეთამაშეთ. ტურნირის დასაწყისში ვთქვით, რომ ინგლისი ერთ-ერთი ფავორიტი იყო, მათ ორი მაღალი დონის ცენტრალური მცველიც ჰყავთ მაგუაირი და სტოუნსი, რომელთა დაჯაბნა რთულია.

მორატას გამო ვწუხვარ, რადგან ის ჩემი მეგობარია, მიუხედავად იმისა, რომ იმ დღეს მეტოქე იყო. პენალტებს მხოლოდ ისინი არ აცუდებენ, რომლებიც მას არ ასრულებენ. სტიუარდი თამაშის შემდეგ? მან თავისი საქმე გააკეთა, თუ კვირას მას შევხვდები, კიდევ ჩავეხუტები.

თავდამსხმელები? ჩირო და ბელოტი მშვიდად უნდა იყვნენ, როდესაც მათ გოლები ვერ გააქვთ, აკრიტიკებენ, მაგრამ გუნდურ მუშაობაში ფუნდამენტური როლი აქვთ. ისინი ყველაფერს გააკეთებენ და შესაძლოა გადამწყვეტი მოთამაშეები აღმოჩნდნენ. ამ გუნდის სიძლიერე ის არის, რომ არა ინდივიდების, არამედ გუნდის გარშემო აშენდა. ნახეთ როგორ შეცვალა დი ლორენცომ ფლორენცი, ძალიან ძლიერი გარემარბების წინააღმდეგ ითამაშა და ყოველთვის კარგად.

კიელინი? 12-მდე ნაკრებში ერთად ვართ, ხოლო 14-ში ასევე ერთად შვებულებაში მივდივართ. ეს საკმარისია იმისთვის, რომ გითხრათ, როგორი ურთიერთობა მაქვს მასთან“, – თქვა ბონუჩიმ.

შეგახსენებთ, რომ იტალიის ნაკრები ევრო 2020-ის ფინალში 11 ივლისს, ინგლისის ნაკრებს დაუპირისპირდება.