პოლ პოგბა “იუვენტუსში” დაბრუნებასთან ახლოსა, მომდევნო შეხვედრა გადამწყვეტი იქნება

ტურინის „იუვენტუსს“ პოლ პოგბა უახლოვდება, მაგრამ გარიგება ჯერ დახურული არაა. ამის შესახებ იტალიური მედია წერს.

პოგბა სოციალურ ქსელში მინიშნებებს აკეთებს, რასაც „იუვეს“ ფეხბურთელების მხრიდან პოსტზე კომენტარებიც მოჰყვა, მაგრამ ჯერ ტრანსფერი არ განხორციელებულა.

პოგბას „იუვე“ 8 მილიონ ევროს და ბონუსებს სთავაზობს, ფეხბურთელსაც სურს ტურინში დაბრუნება და მზადაა 3-წლიანი კონტრაქტი გააფორმოს. თუმცა, საქმეში რჩება „პარი სენ ჟერმენიც“, რომელიც ფრანგს გაცილებით სარფიან წინადადებას სთავაზობს – სეზონში 14 მილიონი ევრო.

მიუხედავად ამისა, პოგბას პრიორიტეტი „იუვენტუსში“ დაბრუნებაა, სადაც იცის, რომ პროექტის მთავარი საყრდენი ნაწილი იქნება, განსხვავებით პსჟ-სგან, სადაც მეორეხარისხოვან როლს უნდა დასჯერდეს, რადგან გუნდში ლიონელ მესი, კილიან მბაპე და ნეიმარი არიან.

მოსალოდნელია, რომ ყველაფერი მომდევნო შეხვედრაზე გადაწყდება. პოგბა ძალიან ახლოსაა „იუვეში“ 6-წლიანი პაუზის შემდეგ დაბრუნებასთან.