ისტორია მეტოქეებთან: ორი დადებითი და ერთი უარყოფითი ბალანსი

ტურინის „იუვენტუსი“ ჩემპიონთა ლიგის ჯგუფურ ეტაპზე „პარი სენ ჟერმენს“, „ბენფიკასა“ და ჰაიფას „მაკაბის“ (H ჯგუფი) დაუპირისპირდება. სამივე გუნდთან ტურინულ გრანდს თამაშის გამოცდილება აქვს, ორთან დადებითი, ერთთან – უარყოფითი ბალანსით.

„იუვენტუსი“ „პარი სენ ჟერმენს“ აქამდე ოფიციალურ მატჩებში 8-ჯერ შეხვდა და არასდროს დამარცხებულა – 6 მოგება, 2 ფრე.

ევროპის სუპერთასზე ტურინელებმა 1996 წელს პარიზში 6:1 მოიგეს, ხოლო საპასუხო მატჩი მასპინძლის სტატუსით პალერმოში გამართეს და ისევ იმარჯვეს – 3:1. ცხადია, სუპერთასი მარჩელო ლიპის გუნდს ერგო, რომელმაც მეტოქე ორი თამაშის ჯამში 9:2 გაანადგურა.

ორი მატჩი შედგა თასების თასზე და ორჯერვე ფრე დაფიქსირდა – 0:0 და 2:2. ოთხჯერ გუნდები უეფას თასზე (ახლანდელი ევროპა ლიგა) შეხვდნენ და ოთხივე თამაში ტურინელებმა მოიგეს. 1989-1990 წლების სეზონში მეორე ეტაპზე „იუვემ“ 2:1 (შინ) 1:0 (სტუმრად) იმარჯვა, ხოლო 1992-1993 წლების სეზონში ნახევარფინალში იდენტური შედეგი დაფიქსირდა: 2:1 ტურინში და 1:0 პარიზში.

ისე უნდა ვთქვათ, რომ ბოლოს ეს გუნდები 2017 წლის ზაფხულში ამხანაგურ მატჩში შეხვდნენ და მაშინაც „იუვენტუსმა“ მოიგო – 3:2. როგორც ხედავთ, ჩემპიონთა ლიგაზე „იუვეს“ პსჟ-სთან თამაში პირველად მოუწევს.

ჰაიფას „მაკაბის“ ტურინული გრანდი ორჯერ შეხვდა და სწორედ ჩემპიონთა ლიგის ჯგუფურ ეტაპზე. 2009-2010 წლების სეზონში „იუვემ“ სტუმრად მაურო კამორანეზის, ხოლო შინ ჯორჯო კიელინის გოლით მოიგო – 1:0, 1:0. სხვათა შორის, მაშინ ორივე გუნდი ჯგუფში ჩარჩა…

სამაგიეროდ, „იუვეს“ უარყოფითი ბალანსი აქვს „ბენფიკასთან“ – 6 მატჩი, 1 მოგება, 1 ფრე და 4 წაგება. ბოლო ოფიციალური დაპირისპირება 2013-2014 წლების სეზონში ევროპა ლიგის ნახევარფინალში შედგა. ლისაბონში, მასპინძლებმა 2:1 მოიგეს, ხოლო ტურინში ნულოვანი ფრე დაფიქსირდა. არადა, იმ სეზონის ფინალი „იუვენტუს სთედიუმზე“ იყო… „იუვენტუსმა“ „ბენფიკა“ ისტორიაში ერთადერთხელ დაამარცხა – უეფას თასზე 1992-1993 წლების სეზონში, ტურინში – 3:0.

აქვე გეტყვით, რომ ჯგუფური ეტაპი 6 სექტემბერს დაიწყება, თუმცა ჯერ კალენდარი ცნობილი არაა.